71. குட்டிக் கவிதைகள்

          1. வள்ளுவர் வழியில்

சிரித்து வாழ்ந்த நாட்களே அதிகம்
காரணம் வள்ளுவப் பெருந்தகை
அவர்தானே சொன்னார் அறிவுரை
துன்பம் வரும்போது சிரியென்று!

2. பறந்து செல்ல நினைத்து விட்டேன்!

பறந்து செல்ல ஆசைப்பட்டுச்
சிறகில்லையே தனக்கென்று
மறுகிய கோழிக்குஞ்சின்
குறை தீர்ந்தது விரைவில்
பறந்தது அது ஓர் கொடும்
பருந்தின் வாயில் அமர்ந்து.

           3. அமரருள் உய்க்கும்?

என் உயரம் நான் அறிவேன்
என்றெண்ணி இருந்தேன் அடக்கமாய்
பொங்கி வந்த ஆசைகளைக் கொன்று
அந்தோ நிகழ்ந்ததென்ன ஆங்கே?
என் தோளில் கையூன்றி எம்பி
என் தலை மேல் தாவி என்னை
முந்திச் சென்று மேலே நின்றார்
என்னில் உயரம் குறைந்தோர்.